Read in English Leer en Español
Durante varios decada, e ritmo di Asambeho a resona den e cayanan di Aruba durante Carnaval, sendiendo un candela den e curasonnan di carnavalistanan y musiconan alabes.
E musica di brassband aki, naci riba tera Arubano, ta hopi mas cu djis un sonido; e ta e ritmo cultural di nos isla, un simbolo di resistencia, y un celebracion di e creatividad Arubano. Su raiz ta core profundo, conectando nos cu e rikesa historico di Aruba.
Awor cu Aruba ta celebrando su Carnaval 71, Aruba Tourism Authority (ATA) ta rindi homenahe na Asambeho como parti di su compromiso pa proteha y preserva e herencia musical di nos isla.
E “Sunset Parade” na Noord y tur cuater parada principal di Aruba su Carnaval lo habri cu e sonido di Asambeho brassband, interpreta pa Massive Brass Band bou direccion di Sr. Roderich Lopez.
E origen di “Asambeho”
E origen di e musica di brassband na Aruba ta bay bek te na principio di siglo 20, na momento cu gruponan manera Pan-Am Club di San Nicolas y Aruba Refinery Brass Band (funda riba 7 di maart 1930) a cuminsa uza instrumentonan di metal den nan presentacionnan.
Pero tabata te na decada di 1960 ora cu dos musico di San Nicolas, Arnold Beyde y Samuel Hodge, a desaroya un estilo ritmico specialmente pensa pa Carnaval di Aruba: Asambeho.
Inspira door di un mezcla di samba, calypso y ritmonan di “marching band” nan a crea un sonido pa baila, cu instrumentonan di metal (trompet, trombon, saxofon) cu ta crea e melodia, mientras cu percusion (bass drum, light drum y snare drum) ta duna e ritmo vibrante.
E estilo aki a debuta den Carnaval di aña 1967, acompañando e Goldfinger Fan Club di Bonaire Club den e parada, marcando un era musical nobo pa Aruba.
E nomber "A-SAM-BE-HO" a wordo scogi oficialmente te na aña 1988, durante un concurso di Instituto di Cultura pa pone un nomber na e ritmo. E palabra ta un abreviacion cu ta combina e nombernan di su creadornan: Arnold (A), Samuel (SAM), Beyde (BE) y Hodge (HO). E combinacion aki ta un tributo na nan, representando unidad y colaboracion den nos herencia cultural.
E legado di brassband
A traves di e añanan, brassband a bira un parti esencial di Aruba su Carnaval, cu gruponan legendario manera entre otro:
Excelsior Brass Band, YMCA Brassband, Brass Explosion, San Fernando Brothers, Savaneta Brass, The Blue Diamond Brass, Daimari Brass, Good Guys, Academy Brass Intl, Gramling Brass, Jamming Brass, Shiribana Brass Band, Hotel All Stars, Rufo All Stars, Royal Stars, Hell’s Angels, Born Losers, The Out Laws, Kids of Fame, DuziDuzi Brass, Little Devil, Dynamic Brass, Energy Brass, Savage Brass, MoonDogs, D2U-365 y Quality Brassband.
E gruponan aki a trece un energia unico riba nos cayanan, compitiendo fuerte pa introduci elementonan nobo, manera quad-drums, steel drum rolls y movecionnan sincronisa. Durante añanan 80, gruponan manera Hell’s Angels a revoluciona e genero cu nan presentacionnan vibrante y innovativo, mientras cu otro bandanan a sigui nan ehempel, agregando influencianan moderno y formando e identidad propio di brassband Arubano.
Sinembargo, a pesar di su popularidad, e musica di brassband a enfrenta desafio. E crecemento den popularidad di musica amplifica, instrumentonan electronico y cambio di moda a haci cu e tradicion di brassband poco poco a bira menos. Un sonido iconico, manera e "wheel-hub" por ehempel, tabata wordo uza hopi menos. Tur esaki a lanta preocupacion si e espirito di Asambeho lo desaparece.
E situacion aki a lanta un movemento pa preserva y rebiba e ritmo unico aki.
Un renacemento lidera pa Aruba Tourism Authority
Aruba Tourism Authority ta reconoce e importancia cultural y historico di Asambeho y ta tuma pasonan firme pa proteha y fortalece e tradicion musical aki.
Na 2024 a honra e tradicion y herencia musical di Steelpan y awor den 2025 e atencion ta riba Asambeho, pa duna e ritmo e lugar cu e merece den nos tradicion carnavalesco.
Den un paso historico, ATA a traves di fundacion Go Cultura, a encarga Massive Brass Band, bou direccion di Sr. Roderich Lopez, pa hiba Asambeho na su gloria un bes mas. Massive Brass Band a wordo scogi pa su autenticidad, dedicacion profundo y esfuerso incansabel na brassband tradicional. E banda tin un laso fuerte cu e raiznan di Asambeho, sigurando cu esaki lo ta un celebracion di historia cu mira pa futuro.
Durante e ultimo añanan, Massive Brass Band lidera pa Sr. Roderich Lopez a percura pa mantene nos Asambeho na bida. Haciendo intentonan impresionante no solamente na nivel local, pero tambe internacional pa expone y promove e musica di Asambeho, inspirando nos habitantenan pa sinti un orguyo renoba pa e hazañanan aki y percura tambe pa esnan rond mundo cera conoci mas di cerca cu parti di nos herencia musical.
Go Cultura: un aliado pa preservacion y innovacion
Go Cultura Foundation, e promotor principal di e Industrianan Cultural y Creativo di Aruba, a wordo encarga un bes mas pa haci e gran iniciativa cultural aki un realidad. Pa varios aña caba Go Cultura ta percurando cu nos herencia no ta solamente wordo recorda, pero ta wordo integra den e desaroyo sostenibel di Aruba.
Despues di e exitoso Proyecto Steelpan na 2024, Go Cultura a demostra su capacidad pa preserva y halsa nos tradicionnan musical. Pa aña 2025, esaki ta sigui cu Proyecto Asambeho, como prueba di e compromiso profundo entre ATA y Go Cultura pa proteha e identidad cultural di Aruba.
E activacionnan aki di ATA no ta solamente pa halsa celebracionnan di pasado, pero ta inversionnan den nos futuro. Asina nos hubentud por wordo inspira y motiva y tambe por continua cu nos tradicionnan manera Asambeho. Asina e huespednan di nos isla tambe ta wordo exponi na nos autenticidad y na loke realmente ta di nos.
E futuro di Asambeho
E proyecto aki ta mas cu un homenahe na pasado. E ta un promesa pa futuro.
Cu esfuerso di Aruba Tourism Authority, Go Cultura Foundation y Massive Brass Band, Asambeho no ta solamente wordo honra, sino ta wordo fortaleci y integra bek den nos paisahe musical.
Durante Carnaval 71, Asambeho lo no solamente wordo tendi. E lo wordo sinti.
Pa recorda nos tur cu nos cultura no ta solamente historia, sino un forsa bibo cu ta forma e alma di nos nacion.
Un seleccion di presentacionnan di Asambeho
Asambeho atraves di e decadanan
Investigacion realisa pa Go Cultura Foundation y texto skirbi pa Edjean Semeleer.
Gradicimento special na Departamento Arubiana-Caribiana di Biblioteca Nacional di Aruba y señora Graciela Ned Cheng pa nan sosten y cooperacion valioso.
